Kiehl's 整蠟燭

有日食飯經過白沙道，見到有間Kiehl's Lab嘅野，有賣涼茶同話有免費蠟燭整。我最鍾意整手工又唔洗錢，梗係即係問下詳情，之後就搵日返工蛇咗過去排隊報名。

好彩我地排到喺最後一日放工時段整。

好鍾意呢個setting

其實冇咩要整，佢準備好整溶咗嘅蠟，我地就先倒一層入個模度，再加啲固體蠟粒等佢可以係好短時間凝固俾我地拎走。倒好模就係係凍水入面浸十五分鐘，之後就脫得模。佢擺係度啲有好多顏色同埋我地想要嘅模，不過當日冇得揀。

免費嘅野都唔要求得咁多，整完拎得走都好好，哈哈！

石澳

尋日去完玩獨木舟今日又去沙灘！好彩之前請咗星期一，唔係應該散晒。

原本今日應該係去我想咗好耐嘅蒲台島，不過轉戰沙灘曬太陽都唔錯嘅。最最重要是有車的朋友一齊去。

天氣超級好，水雖然唔夠清但勝在沙夠幼。人超級多，我地先去沙灘霸位，朋友就慢慢搵位泊車。

其間發生了一段小插曲被朋友取笑。咁我自己就留咗係個超正大帳篷休息。咁有個鬼佬見到，就同我講咗句NICE。朋友差唔多上岸，我就同佢地講個西人讚你個tent，點知佢地就話我點解可以咁唔醒水，呢啲情況唔係應該覺得人地讚緊你，應該繼續搭訕。哈哈，我就完全冇咁諗過，果然係不解風情無咩吸引力嘅中女。

話說當日有件不幸嘅事發生。有一個唔夠廿歲嘅巴基斯坦少年遇溺，我地當時只係見好多人圍觀，好多救護人出動，唔知佢情況，一直到夜晚睇新聞見到經搶救不治。玩咩都好，安全最緊要。

獨木舟

夏天梗係要玩水！

之前都諗住報康文署啲暑期活動，不過水上活動都係晨咁早，仲要大老遠入去赤柱或者西貢，對我有啲難度。細個仲會有神心去，但返工放假瞓到自然醒係一件非常緊要嘅事。所以我都係算吧啦。

咁同事話一齊去玩，又下晝先開始，咁就一齊去玩下。咁我之前就冇玩過，好擔心會反艇，但話說呢個唔使學過又好難反，所以係唔需要擔心太多。

咁冇玩過都要聽下點樣划。其實租艇嘅都冇點講，上到隻船都識點郁。我地啲初哥就係坐綠色膠船，真係幾穩唔怕反。咁兩個考咗三星嘅同事就玩橙色好流線型嘅木船。見佢地好似好輕鬆咁就郁得好快，不過就難平衡啲，大家都反過艇。雖然我地都撐到對面個島仔，不過潮退其實成程啲水都好淺，我唔夠米六都唔到心口，所以真係唔使怕。

天氣唔錯，我地由兩點零開始玩，唔算話好曬同好熱，海中心有海風整體幾舒服，同埋算抵玩，幾個鐘先百五蚊。想慳啲就自己準備多啲，鞋啦，自己帶埋個鎖鎖返啲行李都可以慳返幾十蚊。

夜晚直落去咗西貢同事屋企BBQ。好青春！