今次日本之旅又係獨遊，買機票個陣真係諗都冇諗話要同人夾，因為世界咁大，始終經常性去同一個地方又真係可能悶啲，所以去過嘅我都唔好意思咁密又叫人地去多一次。自己玩中途可能都會有少少寂寞，但就夠晒自由同彈性。間唔中獨自出去下都唔錯。
平機票嘅關係，計日子話就話係12日，但實際上其實得返10日玩。錢我就冇乜，假都有少少，所以就可以用少少假期換張平啲嘅機票。
促成今次日本之旅係因為我睇到一篇介紹狐狸嘅遊記。超得意呀佢地！所以就決今次行程去東北。加上日本北海道新幹線通車，所以再上埋函館玩。其實我有擔心過，始終東北地區比鄰福島，其實咁近輻射洩漏點唔應該去，但最終都係決定唔好諗咁多，最多太近唔去同埋唔好留咁耐。所以一個人出發係正確。
平機票都係買Hkexpress。搭過幾次其實算係咁，無話特別差，廉航都預咗冇服務，所以準時已經叫唔差。第一晚要係機場過，因為要第二朝換咗JR pass先可以去我目的地。記得第一次去東京就係去羽田，十年又過去，個機場好似唔同咗咁。我覺得好靚好舒服，哈哈，日本啲野零捨好，我認我崇日。
深夜時份，啲舖都閂晒門，係吉野家食咗個飯醫肚就係五樓搵個位瞓下。我都預咗瞓唔到，不過可能之前冷親，鼻水長流，周身骨痛，其實好想可以休息下。等呀等，終於等到日出時份可以去展望台睇日出，可以出面天陰有微雨，望下飛機就返返室內等Travel Centre開門。
 |
| 係五樓搵咗個位瞓 |
應該係熱門旅行季節，遊客中心未開門已經大排長龍，最後用咗70分鐘先換到pass，可以出發啦。
第一站係盛岡，東京搭新幹線上去好似兩個幾鐘。第一次搭新幹線，架車好型。其實我細係好鍾意新幹線超人，今次終於坐到佢真身！新幹線好好坐，俾我揀我會揀坐新幹線多過搭飛機講緊時間差唔多嘅話。
遠離東京，天氣放晴！盛岡呢邊天氣好好，拿拿臨去酒店於底行李就出去。酒店都幾近JR駅，而且算係今次旅程比較平嘅住宿。
之前做過資料搜集，呢邊有個百大賞櫻景點－－北上展勝地，最重要係佢係河邊會掛上鯉魚旗，咁有日本feel，所以好想去。生日天天公做美，好開心！
 |
| 大部分櫻花都開始凋謝，但中間位有最幾棵靚最粉紅 |
個公園好舒服，幾乎都係日本人，散下步賞下花，野餐咁，完全唔會悶。由於自己一條友，要留倩影嘅我瘋狂自拍，哈哈。
由於之前冇覺好瞓，又病病地，所以去完呢個景點都返去休息下，明天再戰！
沒有留言:
發佈留言