春。日之旅 Day 3

繼續新幹線之旅，坐車去秋田縣。

秋田行程最後揀咗單車遊田澤湖。踩單車同埋行山幾乎都係我日本會做嘅事。我覺得呢種玩法好啱我，我好享受自然睇景。

租單車可以揀3小時或半日。因為我打算邊遊邊影相，亦都想慢慢踩，所以都係預多啲時間。租單車的地方，老闆會給你一個地圖大致畫出遊湖路線，環湖一周大約兩小時。

途中唔太見到遊人蹤影，可以天氣凍所以人唔多。而且當中封了一段路，平路變斜坡，其實都攰攰地，老闆係我臨出發前都有同我講，再同我加油，哈哈。

沿途多數都係樹林踩，風景一般，直到去到田澤湖女神像，對住個湖，好平靜好舒服，如果唔係天灰灰就仲正。同埋當時有旅遊巴停留，係台灣團，叫做見到下人，哈哈。

回程，腳都軟埋，因為要趕搭巴士，尾段路係瘋狂不停踩。全日都冇乜點食過野，即刻買咗枝米棒食。如果脆啲少啲醬油應該啱我口味啲。

夜晚落咗去角館。發覺日本都鍾意形容自己地方係類似某有名地點。角館就話自己係小京都。我自己就得冇得比，中伏，哈哈。由於我夜晚先去，諗住睇夜櫻，好多餐廳已經關門（營業至五點），而且櫻花都落埋，粉紅色都有乜，所以呢個地方叫做白行一趟。最後是但搵咗間仲有開嘅餐廳食秋田出名的比內地雞。據說呢種雞係多啲肌肉，所以口感比較札實。我其實鍾意嫩滑啲，所以覺得好普通。